احتجب من اجل الحريه

احتجب من اجل الحريه

ليه اهالينا بتحب تتدخل فى حياتنا الشخصيه

انا مش من انصار ان الاهل يتدخلوا فى حياة ولادهم بصوره
كبيره .يمكن خوفهم علينا بيديهم الحق فى ده لكن ده ميمنعش انن مش اى حاجه يدخلوا
فيها . مثلا ايه اللى يخليهم يدخلوا فى جواز ابنهم او بنتهم و اختيارهم لشركاء
حياتهم.انا كان نفسى اعيش لوحدى اخرج و ارجع وقت ماانا عاوزه و محدش يقولى رايحه
فين وجايه منين و لا بتكلمى مين ولا بتعرفى مين و لا بتصاحبى مين.انا محققه حريتى
بدرجه مش بطاله بس موصلتش للدرجه اللى عوزاها طبعا.

انا بكره جدا تحكم امى فيا على الرغم من انها طيبه اوى و مش
بتحب تزعلنى بس اعمل ايه انا بكره ان حد يتعدى على خصوصياتى او يتطفل عليا حتى لو
كان ماما او بابا او كوكى اخويا

تفتكروا كونى عاوزه اعيش لوحدى تخلى الناس تقول عليا منحله
او اهلى مربونيش انا عرضت على بابا انى اعيش لوحدى فى شقه بس هو مرضاش
.

تفتكرو انا اللى كده لوحدى و لا بنات كتير ممكن يكونوا زيى
بس معندهمش الجراه انهم يواجهوا اهاليهم انا لو جاتلى الفرصه انى اعيش لوحدى من
بكره هعمل كده

و لا ايه رايكم انتم

ليه ممكن اكدب على حد بحبه

ممكن اعرف الناس ليه بتكدب على حد
ممكن يكون بيحبهم بجد انا مش فاهمه ايه لزمة الكدب فى حياتنا يعنى هو لو كان ليه
فايده مكنش ربنا حرمه علينا و يعاقبنا عليه .

رسالتى مش بوجهها لشخص معين بس دى
دعوه لللانسانيه كلها اننا لازم نتخلى عن الكدب و خاصة مع اقرب الناس لينا و ممكن
يكونوا بيحبونا بجد و احنا ممكن نخسرهم بالطريق دى لو فضلنا نكدب عليهم . و لا انا
كلامى غلط.

انا عن نفسى اتكدب عليا كتير اوى و
كلهم ناس كنت بحبهم و بيحبونى لكن الكدب ده كسر حاجات كتير حلوه كانت بينا و لحد
دلوقتى مش قادرين نرجع تانى زى الاول لان الكدب بنى حاجز كبير اوى بينا صعب علينا
حتى بتسامحنا اننا نخطيه.

وقالت شهرزاد

اهلا يا كل المدونين انا مدونه جديده حابه انضملكم

انا قررت اعمل مدونه اعبر فيها عن نفسى و افكارى اللى كتير من الناس بيفكروا انها عيب وحرام و لانى بنت ميصحش انى اتكلم فيها و سمتها وقالت شهرزاد لان شهرزاد كانت بتحكى القصص زمان بس انا هحكى قصص دلوقتى اللى ناس كتير عاوزه تسمعها و تتكلم فيها بس مش عارفه علشان التقاليد و العادات و الحاجات الواقعه دى اللى لا تودى ولا تجيب.تابعوا اخبار مدونتى